Psalms 22

Kilio Cha Uchungu Na Wimbo Wa Sifa

(Kwa Mwimbishaji: Mtindo Wa Utenzi Wa Kulungu Wa Alfajiri. Zaburi ya Daudi)

1 ^aMungu wangu, Mungu wangu, mbona umeniacha?
Kwa nini uko mbali hivyo kuniokoa?
Mbali hivyo na maneno ya kuugua kwangu?

2 ^bEe Mungu wangu, ninalia mchana, lakini hunijibu,
hata usiku, sinyamazi.

3 ^cHata hivyo umesimikwa katika kiti cha enzi kama Uliye Mtakatifu;
wewe ni sifa ya Israeli. ▼

▼ Tafsiri zingine zinasema: uketiye juu ya sifa za Israeli.

4 ^eKwako wewe baba zetu waliweka tumaini lao,
walikutumaini nawe ukawaokoa.

5 ^fWalikulilia wewe na ukawaokoa,
walikutegemea wewe nao hawakuaibika.

6 ^gMimi ni mnyoo wala si mwanadamu,
wanaume wamenibeza, na watu wamenidharau.

7 ^hWote wanionao hunidhihaki,
hunivurumishia matusi, wakitikisa vichwa vyao:

8 ⁱHusema, “Anamtegemea Bwana,
basi Bwana na amwokoe.
Amkomboe basi, kwa maana
anapendezwa naye.”

9 ^jHata hivyo ulinitoa tumboni,
ukanifanya nikutegemee,
hata nilipokuwa ninanyonya
matiti ya mama yangu.

10 ^kNimekabidhiwa kwako tangu kuzaliwa,
toka tumboni mwa mama yangu
umekuwa Mungu wangu.

11 ^lUsiwe mbali nami,
kwa maana shida iko karibu
na hakuna wa kunisaidia.

12 ^mMafahali wengi wamenizunguka,
mafahali wa Bashani wenye nguvu
wamenizingira.

13 ⁿSimba wangurumao wanaorarua mawindo
yao hupanua vinywa vyao dhidi yangu.

14 ^oNimemiminwa kama maji,
mifupa yangu yote imetoka katika viungo vyake.
Moyo wangu umegeuka kuwa nta,
umeyeyuka ndani yangu.

15 ^pNguvu zangu zimekauka kama kigae,
ulimi wangu umegandamana
na kaakaa la kinywa changu,
kwa sababu umenilaza
katika mavumbi ya kifo.

16 ^qMbwa wamenizunguka,
kundi la watu waovu limenizingira,
wametoboa mikono yangu na miguu yangu.

17 ^rNaweza kuhesabu mifupa yangu yote,
watu wananikodolea macho na kunisimanga.

18 ^sWanagawana nguo zangu wao kwa wao,
na vazi langu wanalipigia kura.

19 ^tLakini wewe, Ee Bwana,
usiwe mbali.
Ee Nguvu yangu,
uje haraka unisaidie.

20 ^uOkoa maisha yangu na upanga,
uhai wangu wa thamani kutoka nguvu za mbwa.

21 ^vNiokoe kutoka kinywani mwa simba,
niokoe kutoka pembe za mafahali mwitu.

22 ^wNitalitangaza jina lako kwa ndugu zangu,
katika kusanyiko nitakusifu wewe.

23 ^xNinyi ambao mnamcha Bwana, msifuni!
Ninyi nyote wazao wote wa Yakobo, mheshimuni yeye!
Mcheni yeye, ninyi wazao wote wa Israeli!

24 ^yKwa maana hakupuuza wala kudharau
mateso ya aliyeonewa;
hakumficha uso wake
bali alisikiliza kilio chake ili amsaidie.

25 ^zKwako wewe hutoka kiini cha sifa zangu katika kusanyiko kubwa,
nitatimiza nadhiri zangu mbele ya wale wakuchao wewe.

26 ^aaMaskini watakula na kushiba,
wale wamtafutao Bwana watamsifu:
mioyo yenu na iishi milele!

27 ^abMiisho yote ya dunia itakumbuka
na kumgeukia Bwana,
nazo jamaa zote za mataifa
watasujudu mbele zake,

28 ^ackwa maana ufalme ni wa Bwana
naye hutawala juu ya mataifa.

29 ^adMatajiri wote wa dunia watasherehekea na kuabudu.
Wote waendao mavumbini
watapiga magoti mbele yake,
wote ambao hawawezi
kudumisha uhai wao.

30 ^aeWazao wa baadaye watamtumikia yeye;
vizazi vijavyo vitajulishwa habari za Bwana.

31 ^afWatatangaza haki yake kwa watu
ambao hawajazaliwa bado,
kwa maana yeye ametenda hili.